صورتك

ادمنت السهر والدمعة بالعين
واني ادري السهر للعين مو زين
بنارك احترك بس عاشك النار
هيجي تخلص ايام المحبين
تدوركم صفنتي وابقى محتار
يمته احظى بوجهكم يل بعيدين
رماد سنين عمري وبختك الريح
كافي اتهب علي واطشر سنين
اكو واحد يصب ادموعه من ماي
واكو واحد يصب دموعه من طين
بنه تمثال دمعي اتطوفه عشاك
وخذوا مراد من عنده المساكين
شكد شايف جروح بعالم اشكال
مثل جرحي ابد ماشايف اثنين
جرحي يريدك انته وكلشي ميريد
وهم سامع جرح محتاج سجين
وهم زين انه شايل عندي تذكار
لو ماصورتك جا متنه همزين
ابوس بصورتك وتدير الخدود
حتى بصورتك وتكلي بعدين