قصيدة وطنية

جرف الدمع
*****************
ذب ثوب الحزن ريشه بمهب الريح
وحمامات الفرح علباب دليهن
وانزع ذكرياتك ولو همهن ثار
ولوسئلوك عنهن كول ناسيهن
واصفن لليجن حلهن شلون يصير
والراحن بعد ماريد تطريهن
والطاحن ابد لتكلي طاحن ليش
فكرلي بطريقه شلون نبنيهن
يم جرف الدمع شجره العمر مزروع
وفلاح الوكت وهموم يسكيهن
وخضرنه جسد لكن يبسنه ارواح
ينكسرن سهل بس صعبه انديهن
عله كد الماتم جزع حته النوح
وطش روحه الصبر دمعه النواعيهن
مشاهد للذبح بيهه الوصف يحتار
وسوالفهن خرافه بيوم نرويهن
مثل صيد السمج صدنه الجثث بالماي
بس شوف المصيبه شلون نلكيهن
نذب الهن شبج ونجلبه بالرجلين
ونجرهن عكس جيه روس مابيهن
وعده الراحن خطف ماندري راحن وين
وحركتهن جمر بحلوك اهاليهن
وغصتهن لهب خوانهن خوان
بس هسه استحو من طاري اساميهن
وهنه من الادب ومن الخجل ايات
ويكوم الشرف لو جبنه طاريهن
وغيربيوت اهلنه الباكهه التهجير
وسواهن خرايب جف حراميهن
وغير المانعرفه وماتشوفه العين
وبس الله المصايب يدري خافيهن
رافكنه الجوامع والحسينيات
ودامن عالفواتح صوت داعيهن
وبشفاف المأذن صرنه احنه اوذان
كد ما ننتقل حفضنه ثاريهن
وشيفيد العتب واحنه الكضانه الموت
سنابل والمناجل ظنهه تحميهن
ومن كال النهرلجروفه يبني جسور
ولوبيده الكبرته بروجه يمحيهن
ومو صوج الغنم لو غطهه يوم الذيب
ذب كل الخيانه براس راعيهن

منقول