السيارات

السلام عليكم ورحمة الله وبركاته

أشوف بعض الشباب متحمس وده يرهم ويركب ويخربط – خاصة إذا قرى مواضيع عن الترهيم – وأشوف الغالبية أنهم ودهم يركبون بواجي واسلاك بواجي وكويل وام ز دي وهدرز وفلاتر ومرواح.

أنا أقولكم من واقع تجربة أصحاب الخبرة: أن التعديل في القطع الكهربائية ماله أي تأثير على العزم بشكل واضح يستاهل القيمة اللي تبي تدفعها .
فمثلاً باعطيك اسعار القطع الكهربائية اللي دايم الشباب يذكرونها :
1. MSD: سعره 1000 ريال ؟؟؟
2. كويل : أسعاره تختلف لكنن المتوسط تقريباً 400 ريال
3. بواجي : هناك شركات كثر التراب والسعر المتوسط تقريباً 250 ريال على حسب عدد السلندرات ستة أو أربعة.
4. أسلاك بواجي: تقريباً 300 ريال

طيب المجموع الحين : 1000 + 400 + 250 + 300 = 1950 ريال ؟؟؟؟؟
النتيجة ما راح تلقى أي فرق بالعزم يسوى القيمة اللي دفعتها ، بل بعض الأحيان ما يصير فيه فرق.

وبعدين الشركات اللي تسوق هالقطع تبيعك على أنك تكون مركب مثلاً جهاز supercharger أو nitrous kit أو تيربو إلخ من الاجهزة عشان تسفيد الاستفادة القصوى من هالقطع الكهربائية.

هناك نقطة حبيت أوضحها للي يبي يركب هالقطع الكهربائية وهي لا زم تكون مركب فلتر هواء وهيدرز على أقل حال عشان تقدر تقول أنك بتزيد العزم ، أن بضربك لك مثال : لو جبت ماصورة ماء مفتوحة من جتهين وحدة من الفتحتين أكبر من الثانية – خلنا نفرض فتحة الأولى 4 بوصة والفتحة الثانية بوصة واحدة – دخول الماء بيكون بكمية كبيرة لكن خروجه الماء راح يكون ضعيف ، يعني ما استفتدت أي شيء .


يعني لو تركب فلتر هواء رياضي أصلي + هدرز أتوقع أنه راح يكون كافي جداً ولا راح تحتاج للقطع الكهربائية السابقة ، لأن السيارات الحديثة يعني من موديلات 1990 وفوق نظام الكهرباء فيها ممتاز جداً ولا يحتاج تغيير.

لكن إذا كنت والله ملزم تركبها ، ولا همتك فلوسك أنا بقولك وش راح تستفيد :
1. قد يقل عندك صرف البنزين ، وغالبا راح يكون بشكل غير ملحوظ إلا ذا ما تعديت سرعة 120.
2. ما راح يفرق العزم نهائياً بدون فلتر وهيدرز.
3. MSD راح يفيدك إذا كان الآر بي ام عند 1200 أو أقل ، لكن بعد 1200 سيكون عديم الفائدة ( بالعربي كهرب السيارة الأصلي والمعدل راح يكون متساوي بعد 1200 ) لكن والله إذا بغيت زيادة في قوة الشرارة للبوجي ركب كويل بلاستر اس اس من شركة MSD وخل MSD ( مضخم الشرارة ) على جنب.

بالنسبة لتركيب الهدرز ، لازم تكون فتحات المواصير 2.5 بوصة أو أقل – أو 3 بوصة بالكثير – لأنك إذا كبرت الفتحات راح يضيع العزم – كأنك تنفخ في قربة منشقة.

طبعاً سعر الهدرز يتراوح ما بين 1000 ريال إلى 1800 ريال ، لكن فيه طريقة ثانية إذا حسيت أنك ما تقدر تدفع هالقيمة ركب سدة أو حنفية بحيث تكون من 2.5 إلى 4 بوصة وبتكلفك يمكن 100 ريال مع الشغل ووفر باقي الدراهم

هذي بعض الملاحظات اللي حبيت أوضحها ، ولا تنسون مراوح الكهرب ترى لها دور في العزم والتبريد وتقليل صرفية البنزين.

وإذا كان أي واحد عنده اعتراض أن مستعد للنقاش معه.
وتراه منقول

والله صحيح كل هذا ما ينطي اي عزم للسياره


بس للشكل الخارجي فقط !

وشكراا لك