رســــــــــالة

رسالة امن الوطن وياي جايبهه
ألى كلمن يهمه الأمر أقراهه
العراق بشدة طاح اولكن امن الله
برفعة راس هاي الشدة عداهه
على صدر العرب طلقو اسهام الموت
وفزع ليهه العراق بصدرة صداهه
لأن بي غيره تشبه غيرة العباس
ومنو مثل ابو فاضل غيره شالاهه
وراح الكم أوظح بالرسالة اشياء
عليكم بالغلط الاعلام طشاهه
مو شيعي الذبح سني بظلام الليل
ولا سني الي رگبة شيعي گصاهه
واحد أحنه صدگو وما نصير ثنين
وهاي الفتنه والله امريكي سواهه
للمحتل نعم رادو نصيح بصوت
ورفضناهه ورفضناهه ورفضناهه
ولأن بعض السن صاحت نعم مو لا
أجينه اعله السن ذني وگطعناهه
جرم بينه الوكت چتف أدينه اچتاف
وجاب سيوفه كلهه وبينه حداهه
مواقف بالوطن صارت تشيب عقول
واتحده بشر بالكون ينساهه
أجه أمريكي صاعد عالهمر فد يوم
ومثل حنطه البشر بسلاحه ذراهه
الناس اتكتلت والسبب چي سكران
ما صاحي وطلع عالناس يتباهه
وچانت طفلة تلعب ما تعرف الموت
ولعب ماشبعة وبالطلقه لاحاهه
أه شگد بچينه اعليهه لو تدرون
حتى الگاع ناحت من دفناهه
وعن أم راح اسولف عدهه بس ثنين
وگبل ليموت ابوهم ألهه وصاهه
ويلادي أمانه برگبتچ للموت
ومات ويم ولدهه وحيده خلاهه
بسطت بالشوارع حتى ميجوعون
وكبرو والتعب هم يكبر اوياهه
ولجل ترتاح أمهم للشغل يمشون
يوميه اعله مود يعوض ارباهه
واكو مجرم زرع عبوة اعله متن السوگ
ومن وصلو ولدهه النذل طگاهه
ومن سمعت خبرهم بيهه هذا الصار
غفت مو نوم بس الموت غفاهه
ورغم هاي المواقف ما حنينه الراس
وغيرتنه بگصصنه اوسام شلناهه
تحيه الكل بطل شال اعله چفه اسلاح
وطلقاته اعله الامريكان وداهه
وتحيه الكل بطل يفتح لخيه الباب
وبوجه الامريكي الباب سداهه
واختم هالرسالة بخبر عاجل حيل
الخبر بارض العراق امريكه دسناهه

الشاعر
مارتن السفير

[/size]