أنت ليحبك صدك يابو الحسن ... حبك ابدمه وجوباً ينتشر
انت حيدر والاسم ما جه اعتباط ... لان نص اسمك حيا والثاني در
حته عيد الفطر هم صار بسبب ... شلون صار امنين اجه ومن يا كتر
الانبياء البسمه صاموا عليك ... ومن وصلتلهم علي صار الفطر
انت اقرب الي من امي وبوي ... وانت اقرب حته من عندي الي
المو علي حاولو بيه ما وصفوه ... زين ياهو يوصفك وانت علي
يا علي لو ما كدرنه احنه نجيك ... نكدر احنه امن البعد نشبك عليك
ابو تراب الناس كلها من تراب ... اذاً شائت ام ابت كلها تجيك
من محبينك اذا واحد يموت ... بأي بلد يندفن كبره يعتنيك
المات خيعونه يغطيه التراب ... ليش خيعونه لان يتغطه بيك
انت اقرب للضلوع امن الضلوع ... وانت اقرب للجبد من الجبد
والوحيد انت الك ماكو ميلاد ... لان ميلادك قبل لا تنولد
والله يابو حسين ما ادري شكول ... قبل ادم انت موجود اعتقد
قبل ادم انت ما بيها مجال ... والدليل اشكد سهل من فكرت
الكل ابن ادم وادم من تراب ... وابو تراب انت اذاً كبله صرت
اتشرفت بسمك لغتنه ياعلي ... ولأن بيها اسمك انتصرت عالغات
وانت تاريخك علي كله وفاء ... منو حط التاء سواها وفاة
ابو تراب انت ولأن انت ابو تراب ... لهل السبب جاز التيمم بالصلاة
وانت مو ميت علي لا مستحيل ... وانه متأكد واكو عندي اثبات
الحياة البشريه من تراب ... يعني لو ميت علي ماكو حياة
بيش يابو حسين اختم حجيي بيك ... وحته من أختتم تبدي الخاتمه
ليش حيدر علي سماك الاله ... هذه سر ياعلي محد فاهمه
احروف اسمينك علي سبعة حروب ... وربك ابكل حرف ثبتله سمه
_________
بقلم شاعر الشعراء تاج عروشهم
عبد الحسين الحلفي
موضوع: قصيدة في حب امير المؤمنين الامام علي بن ابي طالب عليه السلام 
الثلاثاء يوليو 07, 2009 11:33 am
[/[/img]