غيمة شعر ....

مادام وجهك شمس
واحساسي مثل البحر
يتبخر بخلقتك ويصير غيمة شعر
اصعد واطخ السمه وتحضني بيدك حضن
يا اترف من الكطن
اعصرني بيدك عصر
مشتاك كلش الك شوك الدمع للوجن.
مو صبري كلش خلص وك مارحمني الزمن
اضطريت واتداينت من عنده حفنت صبر..
لو حته باخر نفس وك مايهمني العمر
بس كون اشوفك ترد مليت وانه انتظر
عكس الشمع صرت الك
الخيط ذايب شمع..والشمع بس يشتعل
وبكلبي واهس طفل ..
ماعنده ذرة صبر..
والحفنه خلصت ولك والموت اجه وينتضر
بالباب واكف يدك .. واكباله انه احتضر
صدكني لمن ترد
الموت يشرد شرد ... لو شاف بيك السحر..
طعمك نهر من شهد ..
ماشال نهرك ماي ..
يل تمشي بييه بترف ليل ونهر وياي ..
حراس وسط الكلب خليت بييه شكثر
كد ما اشوفك صرت بكليبي رايح جاي ..
واشتم انفاسك عطر
وبروحي عطرك فاح
تفاح صدرك لحك لاتسد باب النهد ..
لاتقفله بمفتاح..
نفسي دنييه اصبحت وك انه مامرتاح
ادم ولك واعترف .. ما اقاوم التفاح
محتاج حضنك وطن
محتاج بيك اندفن
محتاج حلكــك خمر ... (وابقه انه اسكر سـُــكـُـر..)
كد ماجروحي اشتكن
من كل حقارة زمن
كد ما لواني العمر
اخ الوكت لو يمر
وينك؟ تعال انطرك
مل من دموعه الجفن
وك ضاع مني النوم..
وشكد اغاني اسمعت ..
كلما اضم الجرح ..
واضحك ضحك ملجوم
يطلعلي كلبي صفح
ويغني (ليله ويوم)...
ويزيد نبضه ويدك .. يركض ركض ما يدك..
تعبان خلك الخلك
شتريد هسه انتحر
(وك عادي والله انتحر)
مكبوت بييه العشك
الحكني خاف انفجر..
واصعد واطخ السمه ..ومثل الغيوم انتشر
والكاع مثل الورق ..ودموعي تنزل حبر
وارجع مثل ماجنت
مادام وجهك شمس واحساسي مثل البحر
يتببخر بخلقتك ويصير غيمة شعر
شعر صهيب السامر

اهداء ولكن.....
__________________
اهداء الى شمس