كون اتشوف

(( كون اتشوف ))
عفت كلشي .. . . . وجبت كلشي
ومدري شلون اجيت امشي
اجيتك ردت اكلك شوف
ردنة نعوف كلشي وما عرفنه نعوف
كون اتشوف حالي شكد الك ملهوف
جبت كلشي اليسولف بيك
خيالي وصحوتي وطيوف
جبت دكات كلبي الكطعن كلبي بجفاك سيوف
جبت صفنات روحي السودنت روحي
مثل جن ابمسية وعل اليتيمة ايحوف
كون اتشوف بشفافي الحزن ما خله بسمه اتعيش
كلمن كمت ابسوسه بخده اطبع اوووووف
كون اتشوف ادموع الجدم ما يدري وين ايروح
والخطوات عميه وتايه بلا شوف
كون اتشوف خلصت الوجوه وشفت كل الناس
كلهة وجوه غربة ولاوجه معروف
وين الكاك يالموصوف
اليه وانه الك موصوف
يالفركاك غربة وكلشي ما مألوف
انه بالياك مدري شبيه ما بيه زلف وابلاية ترجية
درب مابيه كل جية
نهر فاض وتبع مية
رجع بس ما لكالة جروف
كون اتشوف روحي اشخله بيهة الخوف
مطلوبة نذر وتخاف ما توصل حظرتك من بعيد اطوف
وكون اتشوف روحي اشخله بيها الخوف
مثل دمع العروس الجايه على اجناب
ويصبر عليها وجابها الزافوف
مثل حلت مدارس روحي احسهة اطفال
حلت وتركتني وباقي بس اصفوف
ويا وحشت اصفوفي ومن يجيني الليل
ويالون الوجه بعدك الظل مخطوف
كون الكاك وشكيلك على اجروحي
الكيت الغشمه بيها اتروف
كون الكاك وابجيلك
واسوي خدودي صبورة ودمعتي احروف
وكون الكاك واحجيلك
بكتاب السنين انحذف كلشي الجان
بس اسمك لكيته الباقي ما محذوف