توصيني اعلة روحي؟؟شعر عازف الليل

توصيني اعله روحي وروحي تعيش؟؟
اذا عنهه بعدت هم تضن تنساك؟؟

يعني اعكد رموشي بحاجبي شلون؟
لأن بجفوني كلما ارمش الكاك

ودعتك ولو كلبي انعصر حيل
واحس بكلبي كله يصيح مشتاك

انته الي اخسرتني واني خسران
وحبنه شكد بجه وخلكه شكثر ضاك

بجيتك مو دمع دمعي بجه عيون
وفوك عيون دمعي دموع الفراك

وابوذيه نطقهه لساني مقهور
شالت ذكرياتي الراحت وياك

وقل ماك
كثر بييه عطش حبك وقل ماك
واشتلنك جنت بييه واقلماك
ذكرى يمي ضل عطرك وقلماك
يبجي ويرسم دموعك الييه

خاطر (عودي ) ضل بجفاك مكسور
من شافك مشيت وماحجه وياك

يكلك لحضه ضل دوزنت الاوتار
والاغنيه التحبهه تموت بجفاك

(انا ما حبك انا اتنفس هواك
كلما فيني يصوتلك أبيك
ضاعت سنيني تاليهه معاك
رد روحي لاتضيعهه بأديك)

مامستوعب انه الصار لساع
كاعد مره اصفن مره ابجيك

نطيتك كلشي عندي بهاي دنياي
وشعندي بعد ..(لو عندي انطيك)

يصلي كليبي الك ويصوم كل يوم
ويطوف شكثر بخطوط جفيك

وعيوني انته بيهن ساكن سنين
وروحي فراش الك جانت تغطيك

اصم بيديه اذاني كبال هالناس
اخاف ابجي اذا مر بييه طاريك

وكلما اصمهن اكثر زاد طرواك
تخيل (جفي واذني السولفو بيك)

شرد احجي بعد مابييه كل حيل
خايف صدفه باجر بيهه الاكيك

وماحاجيك اذا لاكيتك بيوم
وادري لسان كلبي يضل يحاجيك
شعر
صهيب السامر

__________________