قصيدة ((بستان الحزن))

صاحبت الحزن رافكني دنياي
وايقنت الفرح بسنيني قد مات

وزرعته بذني اديه وصار بستان
ولون يعطش اشوفه اسكيه دمعات

واذا حبيت اسولف واكعد وياه
علي يطرق خناجر ماهي جلمات

ويجيني الليل وتفز كل الجروح
وجمر لوعات كلبي يصير نجمات

يلوموني الخلك جي اكتب اشعار؟
وانا الكلبي قصيدة وضيمه ابيات

تعال وشوف روحي منجم هموم
واحفر حدر بيه استخرج اهات

وكمت اصوات اسمع بيه وصريخ
لاجن موغريبه اعليه الاصوات

طلع وادي المنايه بكلبي موجود
ويعذب ارواح احلامي اللي ميتات

ونحت وسنيني طاحن من العيون
على العشرين مرن ماكو بسمات

اريد اظحك صدك واتناسه الدموع
واريد يمرني ليل بليه حسرات

واريد اسمع فرح من صوت فيروز
تعبت اسمع حضيري يجرلي ونات

صرت مثل الشمس بمعاند الغيم
عليهه شما تكاثر تنطي ضويات

هيج انه ويه ضيمي الوجر جلاي
طلكن بالحزن بس بي معسرات
طلكن بالحزن بس بي معسرات